వంశీనాదమదె మోగెరా

వంశీనాదమదె మోగెరా చెవులారా
వంశీరవుడు రవళించి కనిపించ, వంశీనాదమదె మోగెరా చెవులార! 

పొన్నపూదండలల్లి వేచిన రాధిక ఎద పొంగ
తెలినురగల యమున తుళ్ళింతల తూలిపోగ
నీరదమండలమంతా వానధారై పొంగగ  
మన్నుతిని లీలజూపు యదుజన మానసవిహంగ   వంశీనాదమదె మోగెరా చెవులార!

గాలినటన ఒకసారి నాసికభూషినిగా
మురళిగొంతున పూసిన పున్నాగవరాళిగా 
గొల్లభామలను కవ్వించు కవ్వాళిగా  
వెలలేని వేవేల సరాగాల సరులుగా    వంశీనాదమదె మోగెరా చెవులార!

రసమయమై రాసక్రీడలు రాటుదేలగ
రాధ పెదవి చదివే మధురాష్టకం సాక్షిగ
అల్లన పిల్లనగ్రోవికి పులకలు పుట్టగా       
నందన వనమందున నందనందనుని  వంశీనాదమదె మోగెరా చెవులార!  
                                                                                               --------------వంశీ