నీకు నువ్వే

కలతలు కొన్ని, వెలుతులు కొన్ని
నవ్వులు కొన్ని, ఏడ్పులు కొన్ని
పంచిన నిన్నలన్నీ పాడుబడనీ
కదిలే గమ్యమైనా కదలిక సాగనీ
చిన్న చింతలేని బతుకెందుకని
వెనుదీయక నడచిపో మున్ముందుకని
చెల్లాచెదురైన గుండె తునకల్ని ప్రేమతో పేర్చుకుంటూ
నిన్నలు దాటి నలుపులు చిమ్మిన రాత్రుల్ని చీల్చుకుంటూ
ఉదయపుకొసల మీద వెలుతురు పిట్టల్ని వేటాడుకుంటూ
ఒంటరిగా ఓరిమి సముద్రాన ఓటమిని ముంచేసుకుంటూ
రాసుకునే విజయగీతానికి స్వరాలు కూర్చుకుంటూ
చిగురంత ఆశల చిట్టి ప్రపంచాల్ని పుట్టించుకుంటూ
నీకు నువ్వే...నీకు నువ్వే....నీకు నువ్వే!
                                                      -----------వంశీ

Chooda chinnadaanavinthe - Annamacharya keerthana

[url=http://www.divshare.com/download/17106514-bf4]DivShare File - Chooda chinnadaanavinthe.mp3[/url]

ఎందు వెదకెదరా నిన్నెందు వెదకెదరా!

వందనములివె చందురుముఖ నందకుమార
డెందమందున అందమలమిన సుందరాకార
ఎందు వెదకెదరా నిన్నెందు వెదకెదరా

సందుసందుల మోగు అందెల
విందులాయె రేపల్లె మనముల
సందళ్ళ మురళిని గోవుమందలగాతువట ఇందీవర
ఎందు వెదకెదరా నిన్నెందు వెదకెదరా  ||వందనములివె||

చిందులేయ కాళింది మడుగుల
కందువల మందహాసములా
గంధముల మరందవనముల తిరుగాడిన తిరుపురేంద్ర
ఎందు వెదకెదరా నిన్నెందు వెదకెదరా ||వందనములివె||
                                                                             ---------వంశీ

మోమెత్తవేమమ్మ కనక కమలజా

మోమెత్తవేమమ్మ కనక కమలజా   
గోమున శ్రీవిభుగూడిన విరహవిరజా 
  
మీగడ జిలుగు మేను మెరుగు దేరెనా  
ఆగమకళల నిపుణుడొచ్చిన సమయాన
మగని గని వణుకు మోవిరసము తొణికెనా    
ఆ గగనమందిన పలవరింతలేమొ చెప్పగ  |మోమెత్తవేమమ్మ కనక కమలజ|

కాగిన వెన్నెల కావిళ్ళాయెనా
తాగిన తమకపు తేనెలుపొంగెనా
వీగిన బిడియపు కాగిలిలోన       
సాగిన సరసకథలేమొ చెప్పగ |మోమెత్తవేమమ్మ కనక కమలజ|