మాకు వెరపెందుకు? సిగ్గెందుకు?

నువ్వు నేర్పిన భాషతో నిను వేనాల్కల తూలనాడతాం, మాకు వెరపెందుకు?
నడివీధుల్లో నీకు బట్టలూడదీస్తాం, మాకు సిగ్గెందుకు?
నువు మానవతివని తెలిసినా మా వికృతాలు మానం!
రొమ్ము కొరికి నెత్తురు పీలుస్తూనే వుంటాం! 
అదుగో నీ ఘనచరితం మా ముందు మట్టిబొమ్మై మోకరిల్లింది చూడు
నీ సౌభాగ్యం భాగ్యనగరంలో బలైంది చూడు   
ఉరకలేసే ఉన్మాదం మాది, రంకెలేసే రాక్షస రాజకీయం మాది
ప్రాంతీయ విద్వేషమే మా పరమావధి
మా గుండెలు బండరాళ్ళు, మా ఎదలు ఇరుకు గదులు
నిన్నిక ప్రేమించలేమని ఎంత మొత్తుకున్నా వినవే? 
నువు మాకు సరిలేని సిరివి గదమ్మా
నిన్ను ముక్కలు ముక్కలు చేసి పంచుకోనివ్వు!
మా కోసం నిన్ను బలిచ్చుకోనివ్వు!
నీ బిడ్డలమే కదమ్మా, భరిస్తావులే!  
మమ్మల్ని ఇలాగే క్షమిస్తావులే!
                                                            --------------- వంశీ