రామయ్య ఏమయ్య నను గానవూ!

పల్లవి: రామయ్య ఏమయ్య నను గానవూ ||2||
భువితనయ హృదయాలయ, అపరిమిత ప్రేమాలయ, రామయ్య ఏమయ్య నను గానవూ!  


చరణం 1: అమితలావణ్యముల వనిత సీత నీ చెంత 
సందిట సౌమిత్రి మారుతి పరివారమంతా
మహిలో మనుజులు దివిజనులంతా 
అన్నిజీవులు నిను మోహించి మొక్క
తన్మయతెరల నను మరచినావా సాకేత రామయ్య ఏమయ్య నను గానవూ! 

చరణం 2: కలికల్లోలముల బహుకలల వలల

ఎన్ని మోహముల ముంచేవిలా   

మతిహీనుడనైతి మాయలు చాలవా 

నిర్మలచిత్తమీయ జాగింత తగవా    

కోరి కోరి కోటిదండములివె 

నిను కొలిచి కొనియాడ మనసాయె కోదండ రామయ్య ఏమయ్య నను గానవూ!   


చరణం 3: సరసీరుహాక్ష దయార్ద్రదక్షా  
వరసుధావర్ష నీ పదపంకజముల చేరలేని గడ్డిపువ్వునయ్య   
గోపయ్య త్యాగయ్య అన్నమయ నీ భావగానముసేయ 
ఘనుడవై ఘనభక్తుల బ్రోచినావటగద 
ఈ బడుగు బతుకునలుపు మాపర భార్గవ రామయ్య ఏమయ్య నను గానవూ!   
                                                                                        --------- వంశీ