ఒంటరి ఘడియలు

పులుముకున్న శ్రీగంధం కొంచెం గాలిలో కలిపావా,

ఊపిరి తీగలపై ఎడతెగని హాయిసన్నాయి!

తురుముకున్న పూలు విదిల్చి పుప్పొడి ఇటు చల్లావా,
తనువణువులన్నీ అంగారమై ఆవిరవుతున్నాయి!
అనుకుంటూ ఇలాగే బతికెయ్యమంటావా?
నిమిషానికి అరవై గుండుసూదులు గుండెల్లో దిగుతున్నా....  
నువ్వెప్పుడూ నాకు గగన కుసుమమేనా? 
దూరమంతా దగ్గరవ్వాలంటే నిన్నెక్కడ వెతకాలి?
నీళ్ళూరిన కళ్ళలోనా? నిట్టూర్పు సెగలలోనా?
నీటికుండై పగిలే గుండెలోనా? లేవని నిలేసిన నిమిషాలలోనా?

                                                                                 --------------వంశీ